Пакроўскi манастыр (манастыр базыльянаў)

Знаходзіцца ў г. Орша па адрасу Музейны завулак, дом 12, на правым беразе ракі Аршыцы. Пабудаваны ў 1758 - 1774 гг. як базыльянскі кляштар паводле жадання і на ахвяраванні аршанскага старосты Івана Лянькоўскага (пасля гэтага ён сам уступіў у ордэн, прыняўшы імя Іосіф, дасягнуў пасады архіепіскапа смаленскага. Памер у Оршы ў 1771 г. і пахаваны ў храме).

У 1832 г. комплекс перайшоў да праваслаўных і атрымаў назву Пакроўскага   манастыра. У жылым памяшканні размесцілася духоўнае вучылішча. У канцы 20-х гадоў ХХ ст. у колішным храме дзейнічаў сельскагаспадарчы музей, праводзіліся выставы, а ў 1930-х гг. тут быў створаны краязнаўчы музей, які хутка быў зачынены.

Ансамбль складаўся з царквы Апекі Маці Божай (1758 - 1774 гг. пабудовы, не     захавалася) і прыбудаванага да яе жылога корпусу. Царква была пабудавана з цэглы і ўяўляла сабой 3-нефаваю крыжова-купальную 2-вежавую базіліку. Была знішчана ў канцы 1960-х гадоў.

Жылы корпус - помнік архітэктуры барока. Уяўляе сабой 2-хпавярховы Г-падобны ў плане будынак, накрыты вальмавым дахам. Фасады расчлянёны прамавугольнымі вокнамі і плоскімі нішамі, вязкамі пілястраў у прасценках, руставанымі лапаткамі, міжпаверхавымі цягамі. Будынак галерэйнай паэтажнай планіроўкі з цыліндрычнымі і крыжовымі скляпеннямі памяшканняў падвальнага і 1-га паверхаў. У паўднева-ўсходнім крыле размешчаны міжпаверхавая лесвіца, трапезная і актавая зала. Помнік рэспубліканскага значэння.

 

 

 

Дополнительные фотографии и почтовые открытки в фотоальбоме.