 Такога, напэўна, не змогуць прыгадаць нават старажылы рыбаховы: за браканьерства затрымалi дырэктара сярэдняй школы. Кiраўнiком навучальнай установы была... жанчына.
Падрабязнасцi гэтага здарэння "Звяздзе" паведамiў дзяржiнспектар Аршанскай мiжрайiнспекцыi Алег Бахцiн, якi прымаў удзел у прыродаахоўным рэйдзе.
— Увечары ў 23.50 на водасховiшчы, што размешчана на рацэ Іржэўка ў Талачынскiм раёне, мы заўважылi плот на вадзе. На iм быў адзiн чалавек, якi даставаў з сетак рыбу. Потым высветлiлася, што гэта жанчына. На той момант мы яшчэ не ведалi, кiм яна працуе, але ўжо адно гэта моцна здзiвiла — слабы пол ноччу ловiць рыбу сеткамi. На наша пытанне, чаму яна так зрабiла, адказала, што ёй падабаецца лавiць рыбу, — расказаў Алег Мiкалаевiч.
У педагагiчнага работнiка 1957 года нараджэння канфiскаваныя дзве сеткi агульнай даўжынёй 50 метраў i 12 карасёў. Трэба дадаць, што ўсё гэта адбылося, калi яшчэ дзейнiчала забарона на лоўлю рыбы падчас яе веснавога нерасту. На дырэктара сярэдняй школы за парушэнне Правiлаў вядзення рыбалоўнай гаспадаркi i рыбалоўства складзены адмiнiстрацыйны пратакол, якi перададзены для разгляду ў суд Талачынскага раёна. Што тут яшчэ можна дадаць?..
Хiба толькi яшчэ адну гiсторыю, як кажуць, па "школьнай тэме". На возеры Дварэцкае Глыбоцкага раёна дзяржiнспектары затрымалi грамадзянiна, якi разам з няпоўнагадовымi навучэнцамi 7 класа сярэдняй школы падчас дзеяння забароны на лоўлю рыбы i вузкапалага рака здабывалi iх брэднем. Налавiць паспелi 10 рыбiн i 28 ракаў, чым нанеслi прыродным рэсурсам урон у буйным памеры. Глыбоцкi РАУС разглядае пытанне аб узбуджэннi крымiнальнай справы.
Р.S. Дакладныя каардынаты школ у абодвух выпадках мы вырашылi не называць. Цi, магчыма, чытачы маюць iншае меркаванне? У тым сэнсе, што, можа, браканьерства стане менш, калi парушальнiкi не толькi матэрыяльна будуць кампенсаваць нанесены прыродзе ўрон, несцi крымiнальную адказнасць, але яшчэ i будуць ведаць: за свае супрацьпраўныя дзеяннi можна абняславiць уласнае прозвiшча i сваю сям'ю на ўсю краiну?..
Сяргей РАСОЛЬКА
|
