Iмпрэза памяці Караткевіча

25 лістапада а 15 гадзіне ў музэі Караткевіча адбылася традыцыйнае святкаванне Дню Народзінаў пісьменніка. Напярэдадні ў музэі сустрэліся аднакласнікі Караткевіча, а ў нядзелю туды завіталі прыхільнікі яго творчасці з Полацку, Мінска, Магілеўшчыны й Гомельшчыны. Гэта ўжо трэцяя імпрэза памяці Караткевіча ў Воршы, якую сумеснымі сіламі ладзяць студэнты,  выкладчыкі й маладыя спэцыялісты розных гарадоў Беларусі.

Праграма свята распачалася для часткі ўдзельнікаў свята ад самага ранку з наведваньня знакавых для жыцця Караткевіча й гісторыі Беларусі мясцін - Аршанскага замчышча, касцёла, дзе захоўваецца копія карціны "Бітва на Крапіўне", этнаграфічнага музея, помніка Караткевічу, школы, дзе ён вучыўся, хаты, дзе жыў пасьля вайны.

Тым часам арганізатар свята, бард Мікола Рудакоўскі з Рэчыцы, і  нязменны вядоўца імпрэзы, полацкі паэт Алесь Замкоўскі, разам з супрацоўнікамі музэя Караткевіча рыхтавалі музэйныя залі да імпрэзы.

Музычна-літаратурны канцэрт складаўся з чатырох частак адпаведна чатыром вялікім тэмам творчасці Караткевіча: Радзіма, Гісторыя, Паўстанне, Каханне... Пад канец імпрэзы нечакана дадалася яшчэ адна -  гумарыстычная тэма.

Гучалі вершы й паэмы Караткевіча, урыўкі з яго празаічных твораў, песьні на яго словы. Маладыя паэты (Віталь Ананіч і Юлія Шастак з Мінска, Ганна Чумакова з Рагачова, Алесь Замкоўскі з Полацка) чыталі ўласныя творы. Адкрыцьцём сёлетняга святу стаўся выступ Юліі і Рамана Яраша, якія выканалі народныя аўтэнтычныя сьпевы й “Казку” Караткевіча. На завяршэньне імпрэзы павесялілі залю іранічныя вершы магілеўскай паэткі Тацяны Барысік і песні Рамана Абрамчука з Менску.

Пасьля афіцыйнай часткі на сцэну былі запрошаныя ўсе ахвотныя выступіць і сказаць свае словы пра Караткевіча, а затым супрацоўнікі музэя правялі экскурсію па музэйнай экспазіцыі.