На Аршанчыне, паблізу са знакамітымі купалаўскімі Ляўкамі і ў шасці кіламетрах ад пасёлка Копысь, які звязаны з біяграфіяй беларускага прэзідэнта, знаходзіцца вёска Краснапольцы. Да 1963 года яна называлася Амерыка. Але гэтая назва была сцёртая з карты, бо тады ў СССР і ЗША былі нацягнутыя адносіны. І хоць з таго часу прайшло больш за 40 гадоў, месцічы ніяк не прывыкнуць да новай назвы – Краснапольцы. Яны нават не ведаюць, адкуль яна ўзялася і што азначае. Сяляне дасюль называюць сябе амерыканцамі (гэтаксама іх завуць і суседзі з наваколля) і жадаюць, каб іхняй вёсцы вярнулі старую назву.
І хоць у Амерыцы пад Воршай жыве крыху болей за 20 чалавек, а ў вёсачцы ўсяго дзве вуліцы, месцічы маюць гонар. І зайздросцяць жыхарам вёскі Парыж, што ў Пастаўскім раёне, якія нядаўна дамагліся вяртання старой назвы свайго населенага пункта. У свой час беларускі Парыж перайменавалі ў Навадруцк. Назва не прыжылася… "Трэба і нам дабівацца”, – гавораць амерыканцы. "Варочайце Амерыку назад”, – сказаў на развітанне журналістам Рыгор Калістратавіч Марозаў – мясцовая "зорка”, звыклы да гутарак з нашым братам – колькі ў Амерыку на ягоным жыцці карэспандэнтаў прыязджала!
Відавочна, што вёску Амерыка наведаў класік беларускай літаратуры Уладзімір Караткевіч. У 1957 годзе ён напісаў верш "Калумбы зямлі незнаёмай”. У ім ёсць такія радкі: "Адкрыю найлепшую ў свеце Амерыку (веску Амерыка, што пад Оршай)”.
Яна Ильина
|
